नेशन न्यूज मराठी टीम.
डोंबिवली – प्लास्टिक बंदी बाबत जनजागृती करण्यासाठी तसेच पर्यावरण रक्षणात सामान्य नागरिकांचा सहभाग वाढविण्यासाठी 5 जून 2022 रोजी जागतिक पर्यावरण दिनाचे औचित्य साधून सायकल रॅलीचे आयोजन करण्यात आले आहे. कल्याण-डोंबिवली मॅन्युफॅक्चरर्स असोसिएशन आणि महाराष्ट्र प्रदूषण नियंत्रण महामंडळ यांच्या वतीने कल्याण डोंबिवली ठाकुर्ली विभागात हा उपक्रम राबविला जाणार आहे य सायकल रॅली नंतर एमआयडीसी विभागात वृक्षारोपण केले जाईल अशी माहिती कामाचे अध्यक्ष देवेन सोनी यांनी दिली.
प्लास्टिकचा वापर वाढल्याने होणारी पर्यावरणाची हानी टाळण्यासाठी सरकारने महत्वपूर्ण पाऊल उचलताना सिंगल युज प्लास्टिक वर पूर्णपणे बंदी घालण्याचे निर्देश दिले आहेत. प्लास्टिक बंदीची मोहीम मागील काही दिवसांपासून सुरू आहे आत्ता 5 जून या जागतिक पर्यावरण दिनाचे औचित्य साधून पर्यावरण रक्षणासाठी सामान्य नागरिकांचा सहभाग वाढविण्यासाठी ‘रनर्स क्लॅन फाउंडेशन’ च्या सहभागाने सायकल रॅलीचे नियोजन कामा संघटनेने केले आहे.
डोंबिवली एमआयडीसीतील कामा संघटनेच्या कार्यालयापासून घरडा सर्कल – ठाकुर्ली -90 फुटीरोड मार्गे-पत्रिपुल आणि त्याच मार्गाने परत या मार्गाने काढल्या जाणाऱ्या रॅलीत दोनशेहून अधिक सायकलस्वारानी नोंदणी केली आहे. त्याच बरोबर दुचाकीस्वार आणि रनर्स देखील सहभागी होणार आहेत. तर सकाळी 10 वाजता एमआयडीसी परिसरात कामा संघटनेचे सदस्य वृक्षारोपण करून जागतिक पर्यावरण दिन साजरा करतील. तरी जास्तीत जास्त पर्यावरणप्रेमी नागरिकांनी रविवार 5 जून रोजी सकाळी 7 वाजता होणाऱ्या या रॅलीत सहभागी व्हावे असे आवाहन कामा संघटनेच्या वतीने करण्यात आले आहे.