नेशन न्यूज मराठी टिम.
सोलापुर/प्रतिनिधी – बार्शी पोलीस ठाण्यातील पोलीस हवालदार चाळीस हजार रुपयांची लाच घेताना एसीबीच्या जाळ्यात अडकले आहे. गुन्ह्यात अटक करून तत्काळ जामिनावर सोडण्याकरिता ४० हजार रुपयांची लाच घेताना पोलीस हवालदार हर्षवर्धन वाघमोडे यांना पकडण्यात आले आहे. सोलापूर लाचलुचपत विभागाने ही कारवाई केली आहे.
बार्शी तालुक्यातील पोलीस ठाण्यात तक्रारदार आणि त्याच्या नातेवाईकांविरोधात गुन्हा दाखल केला आहे. या गुन्ह्यात तक्रारदार नातेवाईक यांना तात्काळ अटक करून जामिनावर सोडण्यासाठी ५० हजार रुपयांची हवालदार हर्षवर्धन वाघमोडे यांनी लाच मागितली होती. तडजोडीनंतर चाळीस हजार रुपये देण्याचे ठरले. चाळीस हजार रुपयांची लाच स्वीकारताना हवालदार वाघमोडे यांना एसीबी पथकाने रंगेहात पकडले.