नेशन न्यूज मराठी टीम.
मुंबई/प्रतिनिधी – पेपरलेस कामकाजाकडे वेगाने वाटचाल करत असलेल्या बृहन्मुंबई महानगरपालिकेने मुंबईकरांच्या सेवेमध्ये आणखी एक ऑनलाईन सुविधा उपलब्ध केली आहे. केंद्र शासनाच्या ‘डिजीलॉकर’ या ऑनलाईन शासकीय व अधिकृत कागदपत्रांच्या ऍपमध्ये आता मुंबईकरांना विवाह नोंदणी प्रमाणपत्र ऑनलाईन प्राप्त करुन जतन करता येईल.
हा उपक्रम महानगरपालिकेच्या माहिती तंत्रज्ञान विभागाने सार्वजनिक आरोग्य खात्याच्या सहकार्याने राबवला आहे.महानगरपालिकेकडे सन २०१० पासून विवाह नोंदणी प्रमाणपत्र विषयक कामकाज सुरु झाले असले तरी २८ जानेवारी २०१६ पासून विवाह नोंदणी प्रमाणपत्र कामकाज ऑनलाईन करण्यात आले. त्यामुळे या तारखेनंतर नोंदणी केलेल्यांना ही डिजीलॉकर सुविधा मिळेल. विवाहाचे वर्ष कोणतेही असले तरी ऑनलाईन नोंदणी केल्यानंतर हे प्रमाणपत्र उपलब्ध होते.
अशा रितीने आजपर्यंत महानगरपालिकेकडे वैवाहिक नोंदणीची संख्या ३ लाख ८० हजार ४९४ इतकी आहे. अतिरिक्त महानगरपालिका आयुक्त (पूर्व उपनगरे) आश्विनी भिडे यांच्या हस्ते ही सुविधा सुरु करण्यात आली. माहिती तंत्रज्ञान संचालक शरद उघडे, व्यवस्थापक मीनल शेट्ये, डेनिस फर्नांडिस यावेळी उपस्थित होते.