सुभाष मैदानातील क्रीडा संकुलासाठी केंद्रीय क्रीडा मंत्री यांचे सकारात्मक आश्वासन

 

नेशन न्यूज मराठी टीम.

कल्याण/संघर्ष गांगुर्डे – खेलो इंडिया कार्यक्रमांतर्गत कल्याण शहरातील सुभाष मैदानात भव्य क्रीडा संकुल उभारण्यासाठी १४ कोटी ५० लाख रुपये मंजूर करावेत, अशी विनंती केंद्रीय क्रीडा मंत्री अनुराग ठाकुर यांच्याकडे केंद्रीय पंचायती राज राज्यमंत्री कपिल पाटील यांनी केली आहे. या मागणीवर सकारात्मक कार्यवाही करण्याचे आश्वासन केंद्रीय क्रीडा मंत्री ठाकुर यांनी दिले आहे. या पार्श्वभूमीवर सुभाष मैदानातील भव्य क्रीडा संकुलाचे पहिले पाऊल पडले असल्याचे मानले जात आहे.

कल्याण पश्चिममधील ऐतिहासिक सुभाष मैदानाला विविध खेळांची परंपरा आहे. या मैदानातील मातीतून अनेक दिग्गज खेळाडू घडले आहेत. केंद्र सरकारच्या खेलो इंडिया कार्यक्रमांतर्गत सुभाष मैदानात भव्य क्रीडा संकुल उभारण्यासाठी केंद्रीय पंचायती राज राज्यमंत्री कपिल पाटील प्रयत्नशील आहेत. या भव्य संकुलासाठी २४ कोटी ५० लाख रुपये खर्च येणार आहे. त्यापैकी मंत्री कपिल पाटील यांनी खासदार निधी आणि कल्याण-डोंबिवली महापालिकेने प्रत्येकी ५ कोटी रुपये देण्याचे ठरविले आहे.

केंद्र सरकारकडून अपेक्षित असलेल्या निधीमधून नियोजित भव्य क्रीडा संकुलात ४०*२०*१२.५० मीटरचा आंतरराष्ट्रीय स्तरावरील बॅडमिंटन, व्हॉलीबॉल आणि बास्केटबॉलसाठी प्रशस्त हॉल उभारण्यात येणार आहे. त्यासाठी ११ कोटी ८३ लाख रुपये खर्च अपेक्षित आहे. तर हॉकीसाठी प्रकाशयोजना असलेले नैसर्गिक मैदान २ कोटी ६३ लाख रुपये खर्चून उभारण्यात येणार आहे. खासदार निधी व कल्याण महापालिकेच्या माध्यमातून अद्ययावत जॉगिंग ट्रॅक, संरक्षक भिंत, पार्किंग आणि इतर क्रीडा सुविधा उभारल्या जाणार आहेत.

सुभाष मैदानाच्या मातीतून अनेक दिग्गज खेळाडू घडलेले आहे. कल्याणची क्रीडा संस्कृती व सुभाष मैदान असे अनोखे नाते आहे. ते कायम ठेवण्यासाठी २४ कोटी ५० लाख रुपये खर्चून भव्य क्रीडा संकूल उभारले जात आहे. ते कल्याणवासियांच्या अभिमानाचे संकुल ठरेल, अशी प्रतिक्रिया केंद्रीय पंचायती राज राज्यमंत्री कपिल पाटील यांनी व्यक्त केली

Share via

Leave a Reply

Your email address will not be published. Required fields are marked *

© 2020 Nation News Marathi | All Rights Reserved | Designed By - Way For Web