बुलडाणा/प्रतिनिधी – जिल्ह्यातील देऊळगावराजा शहराजवळील बायपासवर एसटी बस आणि ट्रकचा समोरा-समोर अपघात झाल्याची घटना आज सोमवारी घडली असून अपघातामध्ये एक वृध्द महिला जागीच ठार झाली असून बसमधील 25 प्रवाशी जखमी झाले आहे.जखमी प्रवाशांवर देऊळगाव राजा ग्रामीण रुग्णालयात उपचार सुरू असून 5 गंभीर जखमींना पुढील उपचारासाठी जालना जिल्हा रुग्णालयात पाठविण्यात आल्याची माहिती मिळाली आहे.अपघात एवढा भीषण होता की,एसटी बसची डाव्या साईडची मागची बाजू फाडल्या गेली आहे.
जालना येथून यवतमाळकडे एसटी बस जात असतांना बुलडाणा जिल्ह्यातील देऊळगांवराजा शहरातील बायपास जवळ जात असतांना ट्रक क्रॉस करत बसला एक साईड पूर्णपणे फाडत नेले, या अपघातात 1 वृद्ध महिलेचा मृत्यू झाला असून ड्रायव्हर साईडला बसलेले हे 25 प्रवाशी गंभीर जखमी झाले आहेत.स्थानिक नागरिकांनी तात्काळ घटनास्थळावर धाव घेऊन या सर्व प्रवाशांना बसच्या बाहेर काढून त्यांना तात्काळ स्थानिक रुग्णालयात नेण्यासाठी प्रयत्न केले. गेल्या दोन दिवसापूर्वी जिल्ह्यातील सिंदखेड राजा तालुक्यात ट्रक पलटी झाल्याने 13 मजुरांचा मृत्यू झाला होता, ही घटना ताजी असतांनाच परत हा एक मोठा अपघात म्हणावा लागेल.