सोलापूर/प्रतिनिधी – सोलापूर शहरातील संभाजी महाराज तलाव परिसरात मासे वाहतूक करणारा ट्रक रस्त्याच्या कडेला असलेल्या कठड्याना धडकून झालेल्या अपघातात ट्रक पलटी झाल्याने ट्रक मधून मांगुर जातीचे जिवंत मासे रस्त्याच्या कडेला असलेल्या डबक्यात पडले.यावेळी मासे पकडण्यासाठी लोकांची झुंबड उडाली होती.कोरोनाचा वाढता प्रादुर्भाव रोखण्यासाठी शासन,प्रशासनाने सोलापूर शहर जिल्ह्यात लॉकडाऊन व संचारबंदी लागू केली आहे.परंतु त्याचे पालन होत नसल्याचे मासे पकडण्यासाठी झालेल्या गर्दीवरून स्पष्ट होत आहे.
मासे वाहतूक करणारा ट्रक हुबळीवरून सोलापूर मार्गे नागपूरला चालला होता.ट्रक सोलापूर शहरातील संभाजी महाराज तलाव परिसरात आल्यानंतर ट्रॅकवरील चालकाचा ताबा सुटल्याने रस्त्याच्या कडेला असलेल्या कठड्यावर जाऊन आदळला.त्यामुळे ट्रक पलटी होऊन त्यातील जिवंत मासे रस्त्याच्या कडेला असलेल्या सांडपाण्याच्या पडले.
मासे वाहतुकीचा ट्रक पलटी झाल्याची घटना शहर व आजूबाजूच्या परिसरात वार्याच्या वेगाने पसरली.यावेळी मासे पकडण्यासाठी लोकांनी गर्दी केली होती.मासे घरी घेऊन जाण्यासाठी लोकांनी आपल्या सोबत पिशव्या आणल्या होत्या.एकीकडे कोरोनाचा उद्रेक होत असताना लोक अतिशय घाण पाण्यात उतरून कोरोनाचे नियम धाब्यावर बसवीत लोक मासेमारी करीत होते.रस्त्यावरून जाणारा येणारा प्रत्येक जण गर्दी कशासाठी झाली आहे.हे पुलावर थांबून पहात होता.या घटनेची माहिती मिळताच पोलिसांचा मोठा फौजफाटा घटनास्थळी दाखल झाला होता.यावेळी मासे पकडण्यासाठी गर्दी केलेल्या लोकांना पोलिसांनी हुसकावून लावले.